శ్రీకాకుళం :డిశంబరు 10 : నిత్యావసర వస్తువుల ధరల నియంత్రణకు చర్యలు తీసుకుంటున్నట్లు సంయుక్త కలెక్టర్ కె.శ్రీనివాసులు తెలిపారు. మంగళవారం సంయుక్త కలెక్టర్ ఛాంబరులో ధరల నియంత్రణ కమిటీ సమావేశం జరిగింది.ఈ సందర్భంగా జె.సి. కూరగాయలు, అపరాలు, నూనెలు తదితర నిత్యావసర వస్తువుల ధరలపై సమీక్షించారు.గతేడాది కన్నా కందిపప్పు, పెసరపప్పు, ధరలు స్వల్పంగా పెరిగాయని, మినప్పప్పు చింతపండు ఆయిల్స్ ధరలు క్రితం సంవత్సరం కన్నా ఈ ఏడాది ధరలు తగ్గుముఖం పట్టాయని తెలిపారు.పంచదారకు అదే ధర వున్నదని చెప్పారు. కూరగాయల ధరలు బాగా తగ్గాయన్నారు. ముఖ్యంగా పచ్చిమిర్చి, టమోటో, వంగ, బెండ, క్యాబేజీ, దొండ, బంగాళాదుంపల ధరలు బాగా తగ్గాయన్నారు.రైతు బజారులో ఓపెన్ మార్కెట్ రేట్ల కన్నా తక్కువ ధరలకు కూరగాయలను విక్రయిస్తున్నట్లు తెలిపారు. ఉల్లిపాయలు ఈ ఏడాది పంటదిగుబడులు తగ్గడంతో ఓపెన్ మార్కెట్టులో ఎక్కువ ధరకు అమ్మడం జరుగుతన్నదని తెలిపారు. ప్రజలకు అందుబాటులోకి ఉల్లిని తక్కువ ధరకు అమ్మడానికి చర్యలు తీసుకోవడం జరుగుతన్నదన్నారు.కర్నూలు నుండి తెప్పించి జిల్లాలోని మూడు రైతు బజార్లలో 25 రూపాయలకు కిలో చొప్పున ఉల్లిపాయలను ప్రజలకు అందుబాటులోకి తీసుకురావడం జరుగుతున్నదన్నారు. బ్లాక్ మార్కెట్ పై చర్యలు తీసుకోవడం జరుగుతుందన్నారు.నాలుగు తుఫానులు రావడం వలన దేశంలోనే ఉల్లి పంట దిగుబడి తక్కువగా వున్నందున కొరత ఏర్పడిందన్నారు.జనవరి మొదటి వారం నాటికి పూర్తిగా ఉల్లి ధర నియంత్రణలోకి వస్తుందని చెప్పారు.
నిత్యావసర వస్తువుల ధరల నియంత్రణకు చర్యలు
• GURUGUBELLI RAJESWARA RAO
