శ్రీకాకుళం : ఇ కర్షక్ విధానంపై రైతులకు అవగాహన కల్పించాలని జిల్లా కలెక్టర్ జె నివాస్ వ్యవసాయ అధికారులను ఆదేశించారు. గురు వారం సారవకోట మండలంలో పర్యటించిన జిల్లా కలెక్టర్ సారవకోట మండల రెవిన్యూ అధికారి కార్యాలయం నుండి జిల్లా అధికారులతో వీడియో కాన్ఫరెన్స్ నిర్వహించారు. ఇ కర్షక్ కార్యక్రమంను వ్యవసాయ శాఖ వేగవంతం చేయాలని, వారంలో సమగ్రమైన కార్యాచరణ తయారు కావాలని అన్నారు. రైతులకు అవగాహన కల్పించడం వలన ఇ కర్షక్ లో చేరి ఉచిత బీమా పొందుటకు అవకాశం ఉంటుందని పేర్కొన్నారు. జిల్లాలో ధాన్యం సేకరణను వేగవంతం చేయాలని అన్నారు. ధాన్యం నిల్వకు గిడ్డంగుల సమస్య ఉండకుండా టెండర్లు పిలిచామని చెప్పారు. ఉగాది నాటికి ఇళ్ళ పట్టాలను జారీ చేసే కార్యక్రమంలో భాగంగా గృహ లే అవుట్ల తయారీకి జేసీబిలు అధికంగా పెట్టాలని ఆదేశించారు.శ్రీకాకుళం జిల్లా కలెక్టర్ కార్యాలయం నుండి వీడియో కాన్ఫరెన్స్ లో జాయింట్ కలెక్టర్ డా కె. శ్రీనివాసులు మాట్లాడుతూ పట్టణ ఆరోగ్య కేంద్రాలకు స్థలాలను ఎంపిక చేయాలని తహశీల్దార్లను ఆదేశించారు. జిల్లాలో 35 కేంద్రాల్లో ఇంకా ధాన్యం కొనుగోలు ప్రారంభం కాలేదని, తక్షణం ప్రారంభించాలని పేర్కొన్నారు. గిడ్డంగుల సమస్య తీరనుందని, దగ్గరలోని గోడౌన్ లను పరిశీలించి ధాన్యం సేకరణను వేగవంతం చేయాలని సూచించారు. తూకంలో తక్కువ వస్తుందని ఆరోపణలు వస్తున్నాయని చెప్పారు. వీటిని అధిగమించుటకు మిల్లుల వద్ద విఆర్ఓ లను పెట్టాలని అన్నారు. గోనె సంచులు మిల్లర్లు తెస్తున్నారా, రైతు తెస్తున్నారా గమనించాలని, రవాణా చార్జీలు రైతు పెట్టారా, మిల్లరు పెట్టారా అనేది పక్కాగా విఆర్ఓ రాయాలని ఆదేశించారు.
ఇ కర్షక్ పై రైతులకు అవగాహన కల్పించాలి
• GURUGUBELLI RAJESWARA RAO
